Бүгін М.Әуезов атындағы ОҚУ-де Ақпараттық білім беру орталығының ұйымдастыруымен «Бір ел – бір кітап» республикалық акциясы аясында Жұмекен Нәжімеденов пен Тәкен Әлімқұловтың шығармашылығы насихатталды. «Бір дәуірдің қос үні» деп аталатын іс-шара аясында елімізге белгілі журналист, баспагер, «Үш қоңыр» Халықаралық әдебиет, мәдениет және өнер газетінің бас редакторы, «Махамбет», «Жұмекен» республикалық әдеби-мәдени танымдық журналдарының құрылтайшысы Болат Батырмен жастар кездесті.
Кездесуде Болат Батыр қазақтың мәдениеті мен әдебиетіне өлшеусіз үлес қосқан ұлтымыздың асыл азаматтарының руханиятымызға қосқан сүбелі үлестерін атап өтті. Сонымен қатар, «Жұмекен» танымдық журналының тарихына, оқырманға берер мән-маңызына тоқталды.

Кезекті сөз алған «Мұхтартану» ғылыми-зерттеу орталығының басшысы, ф.ғ.к., доцент Ақжол Қалшабек Жұмекен Нәжімеденов пен Тәкен Әлімқұловтың өмірі мен шығармашылығы туралы маңызды мәліметтермен бөлісті. Кітапсүйер қауымға қос классиктің барша кітаптарын оқуға кеңес берді.

«Мәдениет және өнер» факультетінің студенттері ақын Жұмекен Нәжімеденовтың сөзіне жазылған «Менің Қазақстаным» Мемлекеттік Әнұранының шығу тарихынан сахналық қойылым қойды. Көрермен назарына осы әнді алғаш орындаған Жамал Омарованың тұпнұсқа әні ұсынылды. Кеш өнерпаздардың концерттік бағдарламасына жалғасты.

Кездесу кешінен соң оқу залында журналист-баспагер Болат Батыр «Журналистика және қазақ тілі» кафедрасының болашақ тілшілеріне шеберлік-сабақ өткізді.